Qırımda koronavirus yuqunçından vefat etken hastalarnıñ sayısı 20 insanğa arttı. Bu statistik malümatnı Qırımnıñ Rusiye Sağlıq nazirligi iyünniñ 18-nde derc etti.
Bu malümatqa köre, keçken künü eki COVID-19 hastası vefat etti.
Qırımnıñ Rusiye sağlıq naziriniñ muavini Anton Lâskovskiyniñ er künlik brifingde bildirgenine köre, bir insan №7 Aqmescit şeer hastahanesinde vefat etti. Onıñ ciddiy bir qafa-miy yarası bar edi.
«Ciddiy qafa-miy yarasınen ameliyat etildi, COVID-19 qayd etildi, yedinci şeer hastahanesine avuştırıldı. Anda kene ameliyat yapıldı. Alı ağır edi, vefat etti», – dep bildire Lâskovskiyniñ aytqanlarını «Krım24».
Vefat etken ekinci COVID-19 hastası – 91 yaşında kezlevli qadın. Memurnıñ aytqanına köre, diger hastalıqlardan vefat etti.
İyünniñ 18-nde 2998 insan tibbiy közetüv altında buluna, 878 kişi observatorlarğa alındı.
Keçken künü Qırımda bir koronavirus hastası qayd etilmedi, dep bildire Qırımnıñ Rusiye yolbaşçısı Sergey Aksenov.
Onıñ malümatına köre, Qırımda 575 yañı koronavirus hastası qayd etildi. 36-sı çetelden keldi, 90-ı qomşu Rusiyeden kelgenler ya da olarnen alâqada olğanlardır. 389 insan tüzeldi. Aqyarda 195 insan yañı koronavirus yuqunçına oğradı. Al-azırda 22 insan hastahanede buluna. 163 insan yahşı oldı, 3 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
