Aqmescitte fevralniñ 12-nde Rusiye kontrolindeki Aqmescitniñ Kiyev rayon mahkemesi, 2017 senesi noyabr ayında Rusiye uquq qoruyıcıları evini tintken ve bu davanıñ şaatı olaraq sayğan Yuriy Baranov kelmegeninden sebep «Veciye Kaşka davasınıñ» oturışuvını başqa künge avuştırdı.
Advokat Emil Kurbedinovnıñ aytqanına köre, Rusiye prokuraturası, Baranov Qırımdan ketip, Rusiyede buluna, dep israr ete. Faqat şaatnıñ yarımadada olmağanını isbatlaycaq yazma deliller mahkemege berilmedi.
Advokat Ayder Azamatovnıñ qayd etkenine köre, adı belli olmağan ekinci şaat imayeniñ bir çoq sualine cevap berip olamadı. O, olıp keçkenlerni hatırlamağanını aytsa da, qabaatlayıcı tarafnıñ «suallerine cevap bere edi». Bu sualler Asan Çapuhnıñ evinde tapılğan silânen bağlı olğan eken.
«Qırım birdemligi» cemaat birleşmesiniñ Facebook saifesinde bildirgenine köre, oturışuv açıq oldı. Mahkümler Bekir Degermenci, Kazim Ametov, Asan Çapuh ve Ruslan Trubaç mahkemege alıp ketirildi.
Qadı Mihail Belousov, «Veciye Kaşka davasınıñ» kelecek oturışuvı fevralniñ 20-nde olacaq, dep ilân etti.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Yanvarniñ 27-nde Kreml kontrolindeki Aqmescitniñ Kiyev rayon mahkemesi «Veciye Kaşka davasınıñ» mabüsleri Bekir Degermenci, Kazim Ametov ve Ruslan Trubaçnıñ sıñırlav tedbirini deñiştirip, olarnı ev apsine aldı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
