Advokat Nikolay Polozovnıñ Qırım.Aqiqatqa bildirgenine köre, Rusiyede ve işğali altındaki Qırımda apiste yatqan Ukraina vatandaşlarınıñ advokatları ve tuvğanları olarnıñ azat etilüvinde bir ilerilev körmey.
«Prezident ofisi ve reberleriniñ kütleviy haber vastalarında tarqatqan malümattan ğayrı başqa bir şey yoq. 2019 senesi sentâbr ayında olğan deñişimden berli biz, advokatlar, ve siyasiy mabüslerniñ tuvğanları ukrainalı siyasiy mabüslerniñ azat etilüvinde bir ilerilev körmedik», – dedi Polozov Rusiye tarafından devlet hainliginde qabaatlanğan qırımlı İvan Yatskinniñ azat etilüvinen bağlı muzakere esnasında bir netice barmı degen sualge cevap berip.
Polozovnıñ malümatına köre, al-azırda 130-dan çoq Ukraina vatandaşı Rusiyede ya da Qırımda tutula.
«Çoqusı – qırımtatarıdır. Amma, ne yazıq ki, muzakereler olsa, qapalı rejimde keçirile. Prezident ofisi tuvğanları, cemaat teşkilâtlarınen bağ tutmay, muzakerelerni ise Prezident ofisi keçire. (Muzakerelerniñ – QA) ne vaziyette olğanını aytmaq pek zor», – dedi Polozov.
Onıñ bildirgenine köre, İvan Yatskinniñ ricasınen Ukraina prezidentinen ofisine arizasını bergen edi.
«Daa qışta olğan şey. Cevap keldi, Ukraina telükesizlik hızmeti, Tış işler nazirligine yollanıldı dep. Soñra onı (Yatskinni – QA) bir cedvelge alğanlar dep haber keldi, amma onı kimse körmedi. O vaqıttan berli yañı bir malümat yoq, ne yazıq ki», – dep qayd etti Polozov.
Rusiye FSBsi devlet hainliginde qabaatlanğan qırımlı İvan Yatskinniñ davası boyunca tahqiqatnı küzde bitirmege planlaştıra.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu 2019 senesi dekabr ayında belli oldı.
Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
Avgustnıñ başında Ukraina prezidenti ofisiniñ yolbaşçısı Andrey Yermak «100-ge 100» formatında yañı deñişim azırlanıla, dep bildirdi. Yermak, deñişim «tezden» olacaq, dep ümüt etti, amma tam kününi aytmadı.
Onıñ aytqanına köre, Ukraina prezidenti Volodımır Zelenskıy Rusiye prezidenti Vladimir Putin ile kerçekleştirgen soñ subetinde işğal etilgen Qırımdan 22 qırımtatarını azat etmege teklif etti.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
