Qırımda vatandaş jurnalisti, qırımtatar faali Rolan Osmanov "polis hadimleriniñ qanuniy talaplarını yerine ketirmegenine köre" uç künge tevqif etildi. Bunı "Qırım birdemligi" cemaat birleşmesi haber etti.
Tevqif qararını Rusiyeniñ nezaretinde olğan Aqmescitniñ Demiryol rayon mahkemesi çıqardı.
"Qırım birdemligi" cemaat birleşmesi qırımtatar faali "Rusiye Federatsiyası silâlı quvetlerini itibardan tüşürgeninde" ve "polis hadiminiñ qanuniy talaplarına riayet etmegeninde" qabaatlanğanını bildirdi.
Rolan Osmanov üç kün Aqmescitte Pavlenko soqağındaki izolâtorda keçirecek.
Dava materialları iyülniñ 14-nde Rusiyeniñ nezaretinde olğan Aqmescitniñ Kiyev rayon mahkemesinde baqılacaq.
Hatırlatamız, iyülniñ 13-nde «Qırım birdemligi» Rusiye kontrolindeki Qırım Yuqarı mahkemesiniñ binası ögünde kimligi belli olmağan insanlar qırımtatar faali Rolan Osmanovnı tuttı, dep bildirdi.
Faal Lemmar Yunusov Osmanov Rusiyeniñ Ekstremizm ile küreş merkeziniñ binasında buluna, dep haber etti. Bu malümatnı «Krım SOS» aq qorçalayıcı teşkilâtınıñ talilcisi Yevğen Yaroşenko da tasdıqlay.
2021 senesi dekabr ayında Rolan Osmanov o yıl sentâbrniñ 4-nde FSB binası ögünde toplaşuv içün 15 biñ ruble para cezasını aldı. O künü Aqmescit rayonınıñ Biy Tanış (Pervomayskoye) köyünde qırımtatar faali Nariman Celâlnıñ evinde tintüv keçirilgen edi.
2019 senesi aprelniñ 30-nda Rusiye uquq qoruyıcıları Rolan Osmanovnıñ evini tintken edi. Osmanov tutulmağan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
