Rusiye işğal etken Qırımda vatandaş jurnalistikasına sistematik basqı devam ete. Bu aqta Ukraina jurnalistleri milliy birliginiñ beyanatında aytıla. İşbu beyanat Qırımda Rusiye mahkemesiniñ «Qırım birdemliginiñ» koordinatorı Server Mustafayevniñ apis cezasını uzatması, Qırımda «Qırım birdemligi» faallerinde keçirilgen kütleviy tintüvler, bloger Nariman Memedeminovnıñ apiste tutulmasına cevap oldı.
«Faaller yarımadada olğanlar aqqında haberdar eteler, bir çoq allarda ise öz azatlığını telükege oğratalar. Cemaat jurnalistlerine birdemlik köstermek – zenaatdaşlarımızğa bulunğan şaraitlerinde pek müim olğan maneviy destek köstermektir», – dedi UJMB reisi Sergey Tomilenko.
UJMB bildirdi ki, «Rusiye yarımadadaki repressiyalar aqqında kerçek malümat bermek ıntıluvlarını bastırmaq içün bütün yollarnı qullana».
Jurnalistler birliginde haber etilgenine köre, Qırımdaki vaziyet er kün közetile ve «Rusiye uquq qoruyıcılarınıñ jurnalistlerge, şu cümleden vatandaş jurnalistlerine yapqan bozuvlarına» cevap berile.
Ukraina jurnalistleri milliy birligi işğal etilgen Qırımdan vatandaş jurnalistlerini öz saflarına qabul etmege azrı olğanını bildirdi. Qırımtatar faalleri, vatandaş jurnalistleri, qırımlı advokatlarğa yarımada işğali şaraitlerinde çalışqan jurnalistlerniñ UJMB-ne kirmek içün ayrı qolaylaştırılğan yolnıñ tizilmesini muzakere etmege teklif etile.
Aprelniñ 5-nde qırımtatar faali, «Qırım birdemligi» cemaat birleşmesiniñ koordinatorı Server Mustafayevniñ apis cezası iyünniñ 9-na qadar uzatıldı.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
