Qırımda Rusiye ordusına gizli seferberlik devam etmekte, atta universitet mezunları celp etile. Bunı brifing vaqtında Ukrayina prezidentiniñ Qırım MC ve Aqyar şeerindeki daimiy temsilcisi Tamila Taşeva bildirdi.
"Qırımlılarnı cenkke celp etmekniñ esas mehanizmi universitetlerde arbiy işke qabuldır, mında oqutuv yılları devamında gençlerni Rusiye ordusı ile muqavelelerniñ imzalanmasına daa da celp etmek içün faal arbiy propaganda yapıla. Bundan ğayrı, RF ordusına nevbettki askerlikke celp etüv çerçivesinde atta orduğa çağıruv müddetini uzatuvı olğanlar da celp etile. Temsilcilikniñ maiyetinde olğan malümatqa köre, işğal etilgen Aqyar ve Canköy şeerleriniñ tasil müessiselerde ihtisasiy tehnik oquv yurlarınıñ soñki kurs talebelerine malümatlarını sorap bilmek içün celpnameler bergenler. İşğalci arbiy komitetlerine kelgen soñ ise tibbiyet komissiyalarğa yollağanlar. Olarnıñ neticelerine köre mezunlarnınñ episi Rusiye ordusına askerlikke celp etilgen", - dedi Taşeva.
Evel Qırım MC ve Aqyar şeeriniñ prokurorı İgor Ponoçovnıy Rusiye ordusınınıñ ya da diger qanunsız silâlı müfrezelerniñ sıralarına mecburen celp etilgen qırımlılar cinayetçiler degil, silâlı çatışmanıñ qurbanlarıdır, dep bildirgen edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
