Qırımda Ukrayinanıñ işğal etilgen bölgelerinden sürgün etilgen 2 biñge yaqın bala bar, dep bildirdi Prezidentniñ Qırım MC temsilciligi.
"İşğal etilgen yarımadada Ukrayinanıñ farqlı bölgelerinden qırsızlanğan eki biñge yaqın bala bulunmaqta", - dep haber eteler Temsilcilikte.
Ukrayina akimiyetiniñ malümatına köre, olardan 350-niñ çıqarılmasını Rusiye oligarhı Oleg Deripaska teşkil etken.
Martnıñ 17-nde Halqara ceza mahkemesiniñ Başlanğıç mahkeme palatası Rusiyeniñ Ukrayinağa qarşı cenki köntekstinde eki insan içün tevqif orderini çıqardı. Bular Rusiye prezidenti Vladimir Putin ve Rusiye prezidenti yanında bala aqları vekâletlisi Mariya Lvova-Belova. Olar Ukrayinanıñ işğal etilgen topraqlarından ealiniñ (balalarnıñ) qanunsız sürgün etilmesi ve ealiniñ (balalarnıñ) qanunsız şekilde Rusiyege köçürilmesi kibi cenk cinayetlerini yapqanı ile şubeli sayılalar.
Ukrayina Baş prokurorı ofisi Halqara ceza mahkemesiniñ qararını alğışladı ve "Ukrayin ve bütün halqara uquq sisteması içün tarihiy" dep adlandırdı.
Evel Kremlde Gaagadaki Halqara ceza mahkemesini ve onıñ yurisdiktsiyasını tanımaycaqlarını bildirgen ediler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
