Rusiye tarafdarı faal, Qırım milletlerara missiyasınıñ vekili Zaur Smirnov yarımada şeerleriniñ kiçik mesken yerleri ve soqaqlarına Ukrayinağa qarşı cenkte elâk olğanlarnıñ adlarını bermege teklif etti. Bu aqta RİA Novosti haber ete.
''Bizim teşkilâtımız, hatıra ebediyleştirilüvi çerçivesinde, adları manalı olmağan köylerniñ adlarını deñiştirmek meselesini baqmaq teşebbüsinen çıqa, şartlı olaraq aytsaq, Abrikosovka ya da Kalinovka, em de şeer soqaqlarınıñ mahsus arbiy operatsiyanıñ (Ukrayinağa qarşı cenkniñ rusiyeli resmiy adı – QA) qaramanları şerefine adlarını deñiştirmek", - dedi Smirnov.
Qırım ve Aqyarda Rusiyeniñ Ukrayinağa istilâsı vaqtında elâk olğan Rusiye arbiylerini defin etmege devam eteler. Aqyarnıñ Rusiye yolbaşçısı Mihail Razvojayevniñ telegram kanalınıñ malümatına köre, 2022 senesi fevralniñ 24-nden itibaren Aqyarda eñ azdan 100 Rusiye arbiyi defin etildi. Qırımda elâk olğan Rusiye arbiyleriniñ tam sayısını bildirmeyler. Bazı Rusiye arbiylerine hatıra tahtası açıldı.
Qırım.Aqiqat jurnalistleri, Rusiye ordusınıñ Qırım ve Aqyardan Ukrayinağa istilâsı başlağanından berli elâk olğan 650-den ziyade insannıñ şahsiyetini belgiley bildi. Rusiye tarafı ğayıplar aqqında malümatnı resmiy şekilde derc etmey.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
