Qırımda Ukrayinağa qarşı cenkte elâk olğan eñ azından 1312 Rusiye arbiyi defin etildi, dep bildire Ukrayina prezidentiniñ Qırım Muhtar Cumhuriyetindeki temsilciligi. Olarnıñ arasında, müessiseniñ aytqanına köre, eñ azından 762 kişi Ukrayina vatandaşı edi.
"Defn etilgenlerniñ sayısı daa çoq ola bile, çünki emiyetli bir qısmı aydınlatılmay. İşğal etilgen Qırımdan eñ azdan 48 rus askeriniñ esir alınğanı tasdıqlandı, olarnıñ çoqusı, büyük ihtimalnen, Ukrayina vatandaşlarıdır", — dep, qayd etile haberde.
Qırım.Aqiqatnıñ malümatına köre, Ukrayinağa qarşı cenkte Rusiye ordusınıñ saflarında elâk olğan qırımlılarnıñ sayısı 840-tan ziyade oldı. 2024 senesi avgust ayında olardan 40-ınıñ ölümi aqqında belli oldı.
Keriç ve Aqyar "mezarlıqlarnıñ" sayısına köre lider oldılar. Avgust mersiyeleriniñ yedisi Rusiye Federatsiyasınıñ Qara deñiz flotunıñ 810-ıncı deñiz piyade brigadasına ait. Rusiyeniñ Kursk vilâyetinde onıñ aman-aman bütün arbiy hızmetçileri öldürildi, anda avgust ayından berli Ukrayina Silâlı quvetleriniñ ücüm ameliyatı devam ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
