Qırımda soñki vaqıtları qırımlılarğa, hususan 2014 senesinden başlap Ukrayina tarafdarı aktsiyalarında iştirak etkenlerge qarşı basqılar quvetleşe. Bu aqta Ukrayina prezidentiniñ QMC daimiy temsilcisi Ölğa Kurışko "Ukrinform" agentligine bergen intervyüsında ayttı.
"Biz körgen soñki tendentsiya rusiyeliler qırımlılarğa qarşı basqılarnı quvetleştirdi. Olar, 2014 senesinden berli olğan cedvellerni çıqarıp, Şevçenko abidesine çeçekler qoyulğanında, mitinglerde ve ilâhre iştirak etkenlerni tutıp başladılar. Bunı aytmaq içün elimizde malümat bar, o, açıq degil", — dep ayttı Kurışko.
Ukrayina prezidentiniñ Qırım Muhtar Cumhuriyetindeki Temsilciliginiñ malümatına köre, soñki yıl devamında Qırımda qırımlılarnıñ Ukrayina tarafdarı olğanları içün taqip etilüvi sıq-sıq qayd etile.
"2024 senesi 29 "devlet hainligi" davası qayd etildi, bundan evel — üç. Vatandaşlarnı yaqalamaq içün yañı maddeler qullanıla. Aynı şey turmuş ekstremizmi aqqında maddelernen de ola. Ukrayina timsalleri "ekstremist" sayıla, eger insan ukrayin bayrağını taşısa ve ilâhre, bu birden cinaiy mesüliyettir", — dep qayd ete o.
ZMINA insan aqları merkeziniñ idare yolbaşçısı Tetâna Peçonçik "11 yıllıq cenk. Esap noqtası: Qırım" forumı vaqtında halqara teşkilâtlarnıñ Qırımdaki serbestlik seviyesine "100-den 2" bal olaraq qıymet keskenini bildirdi.
QRM-niñ malümatına köre, Qırım yarımadasınıñ Rusiye tarafından ilhaqından soñ 370 siyasiy sebepli cinaiy taqip qayd etildi, olardan 228 — qırımtatarlarğa qarşı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
