Qırımda "Jovta striçka" faalleri Ukrayina destegine şiarlar yazılğan 100-den ziyade Rusiye banknotasını tarqattılar. Bu aqta areketniñ telegram telekanalında haber etile.
''Tükânda qaytarımnı alğanda, işğalciler ''Qırım Ukrayinadır'', ''Ukrayina 2024 senesi yeñecek'', ''Ukrayinanıñ meydanlığı 603 700 km²'' yazılarnı körecekler. Raşistlerniñ paralarını toldurdıq. Biz 100-den ziyade böyle banknotnı tarqatıp oldıq", - dep aytıla haberde.
"Jovta striçka" teşkilâtı - Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areket teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyet eñ faal ola, hususan Aqmescit, Yalta, Kezlev ve Kefede, soñki vaqıtları olarğa kiçik şeerlerniñ Simeiz, Balaqlava sakinleri de qoşula.
Areketniñ eñ belli aktsiyalarından biri - sarı şeritlerniñ asılması ve yarımadada "Qırım Ukrainadır" yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
