İşğal etilgen Qırımda Rusiye quvetçileri Kefede Ukrayina destegine aktsiya keçirgen 15 yaşındaki harkivli qıznı yaqalağan. Bunıñ aqqında yerli telegram kanalları haber ete.
Haber etilgeni kibi, qız memuriy binalarğa Ukrayina destegine yazılarnen beyannameler darqata, vatanperver yarlıqlar yapıştıra ve şerde anda-mında sarı ve mavı tüste tennis toplarını taşlay edi eken.
Telegram kanallarında haber etilgeni kibi, al-azırda "siyasiy sebeplerden yaramazlıq" faktı ile cinayet davasınıñ açılması qararlaştırıla.
Evel "Jovta striçka" areketiniñ faalleri işğal etilgen Qırımda "Al tut" aktsiyanı başlattı. Aktsiyanıñ maqsadı tennis toplarında vatanperver sözleri yazmaq ve işğal etilgen şeerde tarqatmaq edi.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
