Qırımda ukrayin tilşınası, filologiya ilimleri doktorı ve Tavriya milliy universitetiniñ tilşınaslıq fakultetiniñ sabıq dekanı Yevğen Reguşevskiy vefat etti. Bu aqta dekabrniñ 9-nda Qırım ukrayinleri Regional şurasınıñ vekili Andriy Şçekun bildirdi.
"Bugün işğal etilgen Qırımda Yevğen Semenoviç Reguşevskiy vefat etti — ukrain tilşınası, edebiyatşınas, filologiya ilimleri doktorı, professor...", — dep yazdı Şçekun öz Facebook saifesinde.
Reguşevskiy 1975 senesinden başlap Tavriya milliy universitetinde çalıştı: ukrayin tili kafedrasınıñ müdiri (1975), filologiya fakulteti dekanınıñ muavini (1976), tilşınaslıq fakultetiniñ dekanı (1981-2004) oldı. Reguşevskiyge professor (1991), tillerara kommunikatsiyalar ve jurnalistika kafedrasınıñ professorı (2005) ilmiy unvanı berildi .
Onıñ reberliginde ilimler namzeti ilmiy derecesine sekiz dissertatsiya qorçaladı. O, pedagogik faaliyetinen beraber, cemaat faaliyetinen de oğraşa edi, hususan, o, Ukrayina milliy imlâ komissiyasınıñ azası edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
