Ukraina Milliy telükesizlik ve mudafaa şurasınıñ kâtibi Oleksiy Danılov, 2014 senesi Rusiye işğal etken Qırımda Ukraina vatandaşları yaşamaq kerekler, dep qayd etti.
Böylece, o, LB.ua-ğa bergen intervde, Ukraina akimiyeti işğalden soñ Qırımğa köçken rusiyelilernen ne yapacağı sualine cevap berdi.
«Anda Ukraina vatandaşları yaşamalı. Qırım – bizim toprağımız. Bizn anda kimseni çağırmadıq. Anda kendileri ketmege istediler», – dep qayd etti Danılov.
Rusiye Qırımnı ve Donbasnıñ qısmını işğal etken soñ bir çoq Ukraina vatandaşı andaki mülkiyetinden marum qalğan. Onı esassız tutıp aldılar, dedi Danılov.
Qırım işğalden azat etilgen soñ, Ukraina akimiyeti qanunsız sürette anda kelgen Rusiye vatandaşlarını keri yiberecek. Bunı Reintegratsıya nazirliginiñ başı Oleksey Reznikov "Dom" telekanalına bildirdi.
Evel, Reznikov Qırım işğalden azat etilgen soñ yarımadadan iç kimse sürgün etilmeycek, dep bildirgen edi.
«Ukrainada qanuniy sürette yaşamağa isteseler, yabancı vatandaş statusını ala bileler, ukrain vatandaşlığını qabul ete bileler, ya da vatandaşsız olğan şahıslar olaraq yaşay bileler. Stalin rejiminiñ mirasçıları kibi sürgünliknen oğraşmaycağımız », – dedi o.
Qırımtatar halqınıñ milliy lideri Mustafa Cemilev Ukraina baş naziriniñ muavini, Ukrainanıñ vaqtınca işğal etilgen topraqlarınıñ reintegratsiya meseleleri naziri Oleksiy Reznikovnıñ, yarımadağa köçken rusiyelilerni Qırım işğalden azat etilgen soñ sürgün etmek mümkün olmağanı aqqında fikrinen razı olmadı.
Hatırlatamız, 2020 senesi sentâbr ayında BM toplaşuvlarından birinde BM Ukrainanıñ daimiy vekili Serğiy Kıslıtsâ Qırımdaki demografik deñişmelerni «büyük problem» dep adlandırdı. Emin ki, Rusiye Ukraina tarafdarı ealini yarımadadan çıqarmağa tırışa.
Qırım işğali
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
