Aqmescitte martnıñ 6-nda «Pereyaslavska rada 2.0» Rusiye tarafdarları saytınıñ taqdim merasimi olıp keçti. Teşkilâtçılarnıñ aytqanına köre, işbu sayt ilhaq etilgen Qırımda olıp keçken adise-vaqialarnı ukrain tilinde aydınlatacaq. Bu aqta Qırım kütleviy haber vastaları bildire.
Resurs «Qırımdan malümat ve levha» ve esas Ukrainadan malümat derc etecek eken.
«(Esas – QA) Ukrainada bir çoq duşman endi saytımızğa kirip baqa. Bir sıra memnüniyetsizlik ğadap olacağını bekleymiz. Amma biz buña azırmız. Demek, doğru yoldamız, demek ki, er şeyni doğru yapamız», – dep tekrarlay saytnıñ baş muarriri Anastasiya Gridçinniñ aytqanlarını «Krıminforma» Qırım haber agentligi.
Onıñ aytqanına köre, «Pereyaslavska rada 2.0» ukrain müellifleri, Qırım haber agentlikleri ve Beyazrusiye, em de «DNR» ve «LNR» qanunsız silâlı birleşmeleriniñ jurnalistlerinen iş tutacaq.
Sayt eki afta içinde tolusınen çalışıp başlaycaqtır.
Rusiyeniñ Qırım işğalinden ve jurnalistler taqip etilip başlağan soñ bir sıra Qırım internet neşiri – «Tsentr jurnalistskih rassledovaniy», «15 minut», Qırım.Aqiqat, Blackseanews, «Sobıtiya Krıma», Qırım Haber Ajansı Qırımdan Kyivge köçti. Esas Ukrainağa Qırımda ukrain tilinde çıqqan «Krımskaya svitlıtsâ» yekâne gazetası ve «Meydan» ilk qırımtatar radiosı köçti.
