Tutulğan faal ve «Qırım birdemliginiñ» cemaat jurnalisti Ayder Kadırov gece keç saatlarda Aqmescitteki FSB binasından çıqarıldı, dep bildire Qırım.Aqiqat mühbiri.
Advokatı Aleksey Ladinniñ aytqanına köre, Kadırov avgustnıñ 31-nde saba 6-da tutuldı, cinaiy dava ise 22:45-te açıldı.
«Bu vaqıt devamında onı işkencege oğrattılar, dep sayam. Bu insannıñ birinci derece şeker hastalığı bar. Bu vaqıt devamında aç qaldı, FSB hadimlerine hasta olğanını ve aşamaq kerek olğanını ayttı. Kimse qulaq asmadı. Alına baqmadan, añlaşqan advokatını talap etti. Saba 9-dan berli mında edim, mesaclarnen tahqiqatçığa haber ettim, nevbetçige haber ettim, müvekkilime yiberilmegenim içün şikâyetimni qayd ettim. Aqşamğa qadar kimse qulaq asmadı», – dep qayd etti Ladin.
Advokat Marlen Halikovnıñ aytqanına köre, onıñ müvekkili – bazarertesi künü tutulğan daa bir kişi Ridvan Umerovğa qarşı – cinaiy dava saat 21:00-da açıldı.
«Saba 9-dan berli FSB bölüginde ediler. Tahqiqatçınıñ aytqanına köre, anda tahqiqat tedbirleri keçirildi, şu sebepten meni mında yibermediler. Tahqiqat tedbirleri men olmağanda nasıl keçirildi añlatmadılar. Müvekkilimni advokattan, yani menden vazgeçmesine iqna etmege tırıştılar. Ve qabaatını tanımağa teklif ettiler. Balalar çıqıp evge keteceklerine quvanam, amma advokat ve tutulğanlarğa qarşı böyle munasebetni yañlış dep sayam», – dedi advokat.
Avgustnıñ 31-nde Rusiye quvetçileri tarafından tutulğan dört qırımtatar faali bir yerge ketmemek şartınen yiberildi, dep bildire qırımlılarnıñ advokatları.
Faallerge qarşı «çaqmama» maddesine istinaden (Rusiye Ceza kodeksiniñ 205.6 maddesi) cinaiy dava açıldı. FSB tahqiqatçısı Valeriy Şerstükovnıñ bildirgenine köre, tutulğanlar 2015 senesi «Vkontakte» içtimaiy ağında, FSB bildirgenine köre, Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken Umicon Dadajonov ile yazışqan edi.
Uquq qoruyıcılar tünevin keçirilgen tintüvler, tutulğan faaller, qırımtatarlarğa qarşı yapılacaq areketlerni açıq sürette izaatlamay.
Avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñ evinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi. Onıñ aytqanına köre, Ayder Kadırov 4 balanıñ babası ola, büyük balasınıñ balalıqtan berli saqatlığı bar, er adamınıñ özü şeker hastasıdır. «Qırım birdemliginiñ» malümatına köre, Rusiye quvetçileri dördüni de Aqmescitke FSB idaresine alıp ketti. Faallerniñ advokatları bildirgenine köre, olarnı FSB binasına kirsetmegen ediler.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti. Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
