Qırımda avgustnıñ 13-nde Rusiye akimiyeti 389 yañı COVID-19 hastasını qayd etti, avgustnıñ 12-ne baqqanda qayd etilgen hastalarınıñ sayısı kene eksildi, dep bildire Qırımnıñ Rusiye yolbaşçısı Sergey Aksenov.
«Hasta olğanlarnıñ umumiy sayısından 343 hasta tibbiy yardım içün muracaat etkende qayd etildi, 45 kişi daa evel qayd etilgen hastalarnen alâqada oldı, bir kişi çetelden keldi. Bir künde 271 hasta tedaviylendi, bütün vaqıt içinde ise 54 232», – dep bildire Aksönovnıñ aytqanlarını Qırım Nazirler şurasınıñ matbuat hızmeti.
Avgustnıñ 11-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya koronavirus yuqunçı ile küreş operativ ştabınıñ toplaşuvında Qırımda Yalta, İçki ve Krasnoperekopsk rayonları koronavirus hastalarınıñ sayısına köre lider ola, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
