Rusiye quvetçileri Qırımda tintüv keçirgen soñ "Aluşta" musulman din cemiyetiniñ azalarını yaqaladı, dep haber ete "Qırım birdemligi" cemaat birleşmesi.
Söz imam Yusuf Aşirov ve cemiyetniñ eki azası Vilen Useinov ve Zinur Appazov aqqındadır. Olarnıñ episi Şuma köyünde yaşay.
"Bugün tatamnıñ evinde tintüv keçirile. Onıñ aqayı Useinov Vilen Useinoviç, 1981 senesi doğma. Ailede 4 bala. Daa evde Vilenniñ anası yaşay. Qart, hasta bir qadın. Soy-sopnı anda yibermeyler, kimse ögünde esabat bermege borclu olmağanlarını dediler ve azbardan quvdılar", - dep ayttı Useinovanıñ aqrabası Fatima Gafarova.
Uquq qoruyıcılarnıñ haber etkeni kibi, al-azırda qırımtatarlar yaqalı statusında, amma qabaatlavlar ne olğanı daa belli degil. Aşirov, Useinov ve Appazovnı "E" merkeziniñ hadimleri alıp ketti.
"Qırım birdemligi"niñ qayd etkeni kibi, din cemiyeti basqılarğa oğratılğanı artıq ilk sefer degil. 2020 senesi imam Aşirov "qanunsız missionerlik faaliyeti" içün 5 biñ ruble para cezasına mahküm etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
