2021 senesi Qırımda tintüv vaqtında atıp öldürilgen Özbekistan vatandaşı Nabi (Ayub) Rahimovnıñ ömür arqadaşı Sohiba Burhanova Rusiye Federatsiyasını terk etti. Bunı "Qırım birdemligi" cemaat birleşmesi haber ete.
Advokat Edem Semedlâyevniñ sözlerine köre, aprelniñ 2-nde Burhanova resmiy olaraq memleketten sürgün etilgen. Qadın Krasnodar bölgesinde çetel vatandaşlarınıñ tutulğan merkezinde eki yıl keçirgen. Advokat onı anda ziyaret etken.
Anda olar kerkeli vesiqalarnı imzalanğanlar ve ertesi künü RF Mahkeme icracısı Federal hızmetiniñ hadimleri Burhanovanı Mineralnıye vodı ava limanına ketirgenler. Andan o Taşkentke ketken.
"Soñuna qadar quvulmadı. Cenübiy bölgeniñ arbiy mahkemesi onıñ aqayına qarşı açılğan dava devam etkenine ve o qabaatlanğan tarafnıñ vekili olğanı içün kerek olğanına atfı etip buña izin bermey edi", - dedi Semedlâyev.
"Sohiba defalarca evge yollanmasını istedi. Şunıñ içün qararnı temyiz etmeyip birden Özbekistanğa ketti. O sağ-selâmet barıp çıqtı, anda onı soyları qarşılap aldı. Şimdi o tuvğan Samarqandında", - dep qoştı advokat.
2021 senesi Aqmescitte Rusiye quvetçileri tintüv vaqtında Özbekistan vatandaşı Nabi (Ayub) Rahimovnı atıp öldürgen edi. Sebep "o silâ ile qarşılıq köstergeni" olğan.
2021 senesi dekabr ayında Rahimovğa qarşı cinayet davası açılğan edi. 2023 senesi mart ayında ise RF Tahqiqat komiteti erkek "ölümden soñra qabaatlı tanılğanını" bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
