Kreml kontrolindeki Aqmescitniñ Kiyev rayon mahkemesi fevralniñ 15-nde Qurman rayonınıñ Büyük Onlar qasabasında tintüvlerden soñ tutulğan Eskender Abdulğaniyev, Arsen Abhairov ve Rustem Emirüseinovnıñ sıñırlav tedbirini belgileycek. Bu aqta advokat Lilâ Gemeci Qırım.Aqiqatqa bildirdi.
«Standart madde – 205.5 – terrorist teşkilâtlarında iştirak etüv. Eki tutulğan kişini kördim. Dayanalar, tendüristler. Müvekkilim Abdulğaniyev anasına Rabbi eñ yahşı qullarını sınap baqa, dep yazdı, ondan ğururlanmağa rica etti ve terrorist areketlerinde iştirak etmegenini ayttı. Şimdi o, şübheli olaraq sorğuğa çekildi ve cinaiy iş açılğanına dair qarar aldı. Onı ekinci qısımğa istinaden (Rusiye Ceza kodeksiniñ 205.2 maddesi – QA) qabaatlaylar. Yarın er kesniñ sıñırlav tedbiri belgilenecek», – dedi Gemeci.
Onıñ aytqanına köre, müvekkili Eskender Abdulğaniyevniñ evinde tintüv keçirilgende bozuvlar oldı.
«Evinde keçirilgen tintüv vaqtında bir sıra bozuv oldı. Tintüvniñ bütün protokolları oña berilmedi. Bütün ihtarlarımıznı tutuv protokolına yazdıq. Tintüv vaqtında olğan şaatlar er vaqıt çıqa edi. Cep telefonına video çıqarıldı. Video çıqarğan şahısnıñ kim olğanı belli degil. Uquq qoruyıcılar çardaqqa özleri çıqtı. Cep telefonları, planşetler ve namaz qıluv kitabı çekip alındı», – dep qoştı o.
Daa evel Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları qırımtatarlarnıñ evlerini tinte, dep haber etilgen edi. «Qırım birdemligi» birleşmesiniñ malümatına köre, Aqmescitteki FSB idaresine Eskender Abdulğaniyev, Arsen Abhairov ve Rustem Emirüseinov alıp ketirildi.
Rusiye FSBsi, Qırımda «Hizb ut-Tahrir» teşkilâtınıñ bölügini qurğanından ve anda iştirak etkeninden şübheli sayılğan üç insannıñ evinde tintüv keçirdi, dep bildire.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
