İslâm-Terek rayonınıñ Jemçujina Krıma köyünde keçirilgen tintüvden soñ tutıp alınğan Dilâver Gafarov silâlı birleşmede iştirak etmesinde (Rusiye Ceza kodeksiniñ 208-inci maddesiniñ 2-nci qısmı) şeklene. Bu aqta «Qırım birdemligini» birleşmesiniñ Facebook saifesinde aytıla.
Rusiye uquq qoruyıcı hızmetleriniñ saytlarında Dilâver Gafarov tutulğanına dair bir malümat yoq.
Oktâbrniñ 30-nda saba İslâm-Terek rayonınıñ Jemçujina Krıma köyünde Rusiye uquq qoruyıcıları yerli sakin, tükân satıcısı Dilâver Gafarovnıñ evinde tintüv keçirdi.
«Qırım birdemliginiñ» Qırım.Aqiqatqa bildirgenine köre, Gafarovnıñ evinde silâ qıdırıp, «bir şey tapmadılar». Uquq qoruyıcılar Gafarovnıñ bilgisayarı, telefonı, vesiqaları, Ukraina ve Rusiye pasportları alındı. Uquq qoruyıcılar eki qıznı Kefeden şaat olaraq ketirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
