Qırımnıñ Rusiye parlamenti yerli tibbiyet hadimleri ve Rospotrebnadzor hadimleri içün iyünniñ 1-ne qadar yol imtiyazlarınıñ kirsetilüvine dair qanun leyhasını qabul etti.
Vesiqağa köre, şeer ve şeer civarındaki avtobus, trolleybus, tramvaylar bedava olacaq.
«İçtimaiy yardım iş bergenniñ vesiqası esasında kösterile», – dep aytıla haberde.
Qırımda soñki künde yañı koronavirus hastası qayd etildi, aman-aman üç biñ insan tibbiy közetüv altında buluna, beş kişi tüzeldi. Aqyarnıñ Rusiye akimiyeti, aprelniñ 6-na qadar şeerde yañı koronavirus hastaları qayd etilmedi, 1800-den çoq insan közetüv altında buluna, dep bildire.
Qırımda aprelniñ 3-nden 6-na qadar acele bir şey olmasa, evden çıqmağa yasaq etildi. Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.
Qırımda özüni tecrit etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
