Qırımnıñ sakinleri mayısnıñ 26 ve 27-nde tutulğan dört advokat Edem Semedlâyev, Nazim Şeyhmambetov, Ayder Azamatov ve Emine Avamilevanıñ destegine baştalığan "Halq mudafaacıları" onlayn fleşmobda iştirak eteler. Bunı "Qırım birdemligi" cemaat birleşmesi haber ete.
Fleşmobğa Büyük Onlar, İslâm Terek, Eski Qırım, Canköy, Bağçasaray, Seyitler, İçki ve Aqmescit sakinleri qoşuldı.
Bundan ğayrı Privetnoye ve Sovestkoye qasabalarından qırımtatar aqsaqalları advokatlarnıñ destegine video muracaat çıqardılar.
Mayısnıñ 26-nda Aqmescitte Rusiye uquq qoruyıcıları tarafından tutulğan qırımlı advokat Edem Semedlâyev Qırımda Rusiye Federatsiyası ordusınıñ Ukrainada yapqanlarını «itibardan tüşürgeni» içün 75 biñ ruble para cezasını aldı.
Şu künü Rusiye quvetçileri Aqmescitte mahkeme binası yanında advokat Edem Semedlâyevge uquqiy yardım köstergen advokat Nazim Şeyhmambetovnı yaqaladı. Qırımda Rusiyeniñ nezaretinde olğan Aqmescitniñ Merkeziy rayon mahkemesi qırımlı advokatqa sekiz kün memuriy apis cezasını berdi.
Ertesi künü Aqmescitte Rusiye polisi daa eki Qırımlı advokatnı - Ayder Azamatovnı ve Emine Avamilevanı yaqaladı. Rusiye kontrolindeki Aqmescitniñ Merkeziy rayon mahkemesi qırımlı advokat Azamatovğa sekiz kün, Avamilevağa beş kün idariy apis cezasını bermege qarar aldı.
Ukrayin aq qoruyıcıları Qırımda advokatlarnıñ tutulmasınu takbih ettiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
