Qırımda tevqif etilgen emşire, vatandaş jurnalisti İrına Danılovıç yañı mektübinde Rusiye quvetçileri tarafından oña qarşı tazyıqnıñ artqanını bildirdi. Bunı "QırımSOS" uquq qoruyıcı teşkilâtı haber ete.
Danılovıç, kamerasında "plandan tış tintüv" keçirilgeni aqqında aytıp berdi. Bunıñ neticesinde SİZO hadimleri onıñ şahsiy defterini tutıp alğanlar. Defterde mahkeme içün soñki sözü ve şiirler bar eken. Bundan ğayrı onı "izaatname" yazmağa mecbur etkenler.
Danılovıç, şahsiy defteriniñ tutıp lanıması onıñ aqlarını bozğanını bildirdi.
"Мени сустырмакъ ичюн даа насыл усулларны къулланаджакълар бильмейим. Оларнынъ ишини mürekkepleştirmek ичюн бунынъ акъкъында айтмакъ керек", - деп язы Даныловыч.
"QırımSOS" talilcisi Yevgen Yaroşenko Danılovıçnıñ mektübini talil etip, SİZO-da "faalniñ bir çoq insan aqlarınıñ bozulması ile qarşılaşa bilgenini" tahmin etti.
Rusiye FSB-si Qırımda tevqif etilgen emşire, vatandaş jurnalisti İrına Danılovıçnı"devlet hainliginen" qabaatlaycaq ola.
Rusiye Ceza Qanunnamesiniñ 275 maddesine ("devlet hainligi") binaen qabaatlanğan kişi 12-20 yıl apis dezasına mahküm etile bile.
İyünniñ başında RF adliye nazirligi qırımlı emşire İrına Danilovıçnı "çetel agantler" cedveline kirsetti.
Mayısnıñ 13-nde advokat Ayder Azamatovnıñ bildirgenine köre, İrına Danılovıç hırsızlanğan soñ Qırımdaki Rusiye FSBsiniñ idaresinde sekiz kün tutuldı. Onı bir şey gizlese, «ormanğa çıqarırlar», dep qorquzdılar. Bu vaqıt devamında Daniloviçke künde bir kere aş berildi. Rusiye FSBsinde tutuluvınıñ soñunda hırsızlanğan vatandaş jurnalistine azat etilecek dep boş kâğıtlar imzalaması içün berildi. Bunı yapqan soñ Danılovıçqa onıñ çantasında 200 gramm patlayıcı madde tapıldı dep, onı mahkemege sıñırlav tedbiriniñ belgilenmesi içün alıp kettiler.
Rusiye uquq qoruyıcıları advokat Azamatovnıñ aytqanlarını izaatlamadı.
Mayısnıñ 11-nde bulunğan yeri aprelniñ 29-ndan berli belli olmağan İrina Danılovıç Aqmescit SİZOsında tutulğanına dair malümat resmiy şekilde tasdıqlandı.
Danılovıç patlayıcı madde ya da patlayıcı cihazlarnen qanunsız areketlerde (Rusiye Ceza kodeksiniñ 222.1 maddesiniñ 1-inci qısmı) şübheli sayıla. O, mayısnıñ 7-nde apiske alındı. Advokatı Ayder Azamatov onı sekiz kün devamında, em FSB idaresinde, em advokatlar palatasında qıdırğanına baqmadan, oña devlet advokatı berildi.
Hatırlatamız, vatandaş jurnalisti İrına Danılovıç aprelniñ 29-nda sabadan berli bağğa çıqmadı. Yaşağan evde onsız Rusiye FSB hadimleri tintüv keçirdi. Tintüv neticesinde Danılovıçnıñ ana-babasından bütün cep telefonları alındı ve bir qaç kün olar kimsege haber etip olamadı.
Mayısnıñ 5-nde belli olğanına köre, yaqarlıq stantsiyalarından birinde kameralar hırsızlavnı qayd etti. Danılovıçnıñ babası aytqanına köre, videoda İrına Danılovıç kiyingenine oşağan bir urbada qadın duraqta tura ve qara maşina toqtala. Maşinadan bir qaç kişi çıqa ve qadın tirense de, onı maşinağa mindireler. Video babağa berilmedi, çünki onı yalıñız polis hadimleri ala bile, dep haber etildi.
Qırım Muhtar Cumhuriyetiniñ prokuraturası İrına Danılovıçnıñ qanunsız tutuluvı ve tintüvlerinen bağlı cinaiy tahqiqat başlattı.
Ukrainanıñ cemaat teşkilâtları vatandaş jurnalisti İrına Danılovıçnı azat etmege talap etti.
İrına Danılovıç emşire olıp çalışa ve içtimaiy ağlarda saifesi ve bir qaç bloger saifesi bar. Anda işğal etilgen yarımadadaki tibbiyet hadimleriniñ aqları ve sağlıq problemlerinen bağlı yazılar paylaşa.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
