Kreml nezaretindeki Aqmescit Kiyev rayon mahkemesi cemaat jurnalisti Nariman Memedeminovnıñ nezaret altında bulunma müddetini eki ayğa uzattı, dep bildire Qırım.Aqiqat mühbiri.
«Bugün terrorizmde qabaatlanğan Nariman Memedeminovnıñ nezaret altında qalma müddetiniñ uzatılması boyunca oturışuvğa keldik. Mahkeme bizim içün sürprizden başladı – qadı, o birisi kün bergen Rusiye ceza-protsessual kodeksiniñ 125-inci maddesine köre şikâyetimiz boyunca oturışuv olğanını ayttı, biz tahqiqatçı dava malümatlarınıñ fotoresimini yapmağa bermeyip, imaye aqlarını boza, degen edik», – dep ayttı advokat Emil Kürbedinov.
Advokat Edem Semedlâyev şikâyetniñ baqılmasını başqa künge qaldırmağa rica etken soñ, mahkeme Memedeminovnıñ tevqif müddetini uzatma meselesini baqmağa başladı.
Bundan ğayrı, Kürbedinovnıñ aytqanına köre, mabüs mahkeme oturışuvında qadınıñ areketlerine qarşı narazılıq bildirdi.
«Nariman qadını çetleştirmege çağırdı, qadı ilk saniyeden başlap oña ikrah etkenini tüşüngenini bildirdi. Onıñ aytqanına köre, bu areketlerinden añlaşıla edi. Qadı çetleştirilmedi. Bundan soñ Nariman adalet olacağını körmeyip, mahkemede olmağa istemegenini bildirdi. Qadı bu muracaatına qulaq asmadı. Bundan soñ Nariman narazılıq bildirmek içün indemeyip oturdı», – dep qayd etti Kürbedinov.
Martnıñ 22-nde Bağçasaray rayonında Rusiye telükesizlik hadimleri ve uquqqoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
