İşğal etilgen Qırımda 1000 kün devam etken tam cenkte Rusiye ordusında askerlik yapmaqtan vazgeçken 260 insan mahküm etildi, dep bildire "Qırım epizodı" uquq qorçalayıcı teşebbüsi mahkeme oturışlarınıñ cedvellerine atıf etip.
"Tam miqyaslı cenkniñ biñ kününde işğal etilgen Qırımdaki mahkemeler Rusiye ordusında hızmet etmekten qaçınğan yerli sakinlerge eñ azından 260 üküm çıqardı", — dep aytıla haberde.
Qayd etilgenine köre, er dört künde uquq qoruyıcılar mahkemege bir cinaiy iş boyunca yollay ediler. Yalıñız 6 vaziyette mahkeme davalarnı toqtatqanı aqqında belli. Tam cenkniñ 1000 kününde mahkemeler yarımadanıñ sekiz yıllıq işğalinde baqılğan davalarnıñ aman-aman aynı miqdarını baqqan, dep qoşa teşkilât.
Uquq qoruyıcılar qayd etkenine köre, işğal etilgen topraqlarnıñ sakinleriniñ mecburiy mobilizatsiyası halqara gumanitar uquqnıñ bozuluvıdır.
Qırımda ve Aqyarda aman-aman er kün cenkte elâk olğan Rusiye arbiyleriniñ cenazeleri ötkerile. Qırım.Aqiqatnıñ malümatına köre, Rusiye ordusında öldürilgen qırımlılarnıñ sayısı 920-den ziyade oldı. 2024 senesi oktâbr ayında olardan 30-ınıñ ölümi aqqında belli oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
