Qırımnıñ Rusiye mahkemesi, Rusiyeni desteklegen bloger Aleksandr Talipovnı öldürmege tırışqanı içün eki Kefe sakinini 16 ve 10 yılğa apis cezasına mahküm etti.
"2022 senesi dekabr ayından 2023 senesi iyün ayına qadar Ukrayina mahsus hızmetleri Kefe sakinlerini işbirlik yapmağa mecbur etkenleri belli oldı. Namzetni teşkermek içün, kuratorlar oña "Z" arfi olğan er angi maşnanı yaqmağa teklif ettiler, 2023 senesi fevral 22-de gece öyle de oldı", — dep aytıla Rusiye Tahqiqat komitetiniñ haberinde.
Qayd etilgenine köre, tanışını qanunsız faaliyetke celp etken mabüsniñ esas vazifesi "cemaat erbabını" yoq etmektir.
"2023 senesi iyün ayında iştirakçilerniñ birinci teşebbüsinde uzaqtan idare etilgen cihaz çalışmadı. Lâkin 2023 senesi iyülniñ 12-nde aqşam Kefe şeerindeki evniñ azbarında tekrar yapılğan ücüm neticesinde, SVU mototsikliniñ qafesinde patlav yüz berdi", — dep haber ete RF Taqiqat komiteti.
Muarririyet Rusiye tarafınıñ malümatını teşkerip olamay.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını "areketsizleştirgenleri" içün yaqalana ve memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
