Qırımlı iş adamı, Yaltadaki «Skazka» ayvanat bağçası ve Qarasuvbazardaki «Taygan» arslanlar parkınıñ saibi Oleg Zubkovnıñ bildirgenine köre, Qırımda qurğaqlıq sebebinden suv yedekleri yetmey, şunıñ içün, onıñ fikirince, akimiyet «fevqulâde vaziyet rejimini» ilân etmeli.
«Qurğaqlıq aqibetlerini eksiltmek içün suv yetmegeninden fevqulâde vaziyet rejiminiñ ilân etilüvi sozulmamalı. Bugün Qarasuvbazar suv anbarında 8 mln metr kub suv qaldı ve er saniye ondan Şimaliy-Qırım kanalına 2,5 metr kub suv atıla. Qarasuvbazar suv anbarınıñ suvı mayısnıñ soñunda – iyünniñ başında bitmesi mümkün. İyül-avgust aylarında Keriç, Sudaq, Kefe ve şarqiy Qırım qasabalarınıñ suv teminlevi ne olacaq?!», – dep yazdı o, öz blogunda.
Zubkovnıñ fikirince, Qırım suv anbarlarından qullanıcılarğa suv berilüvi toqtatılmalı.
«Qırımda suv altın kibi olacaq iyül-avgust aylarına belli bir suv yedegini yapmağa imkân olacaq. Bugün daa o qadar sıcaq degil, şeerlerniñ yaqındaki suv anbarlarında belli bir yedekleri bar, tükânlarda ise suv şişeleri bar. Bugün köy hocalığı aqqında laf ketmey, o endi tabiatqa qaldırılacaq. Bugün iç olmadım Qırım ealisini suvnen temin etmeli», – dep añlattı iş adamı.
Keçken afta Qırımnıñ Rusiye yolbaşçısı Sergey Aksenovnıñ bildirgenine köre, yağanaqlar olmasa bile, Aqmescitniñ üç esas suv çoqrağı olğan Ayan yapma gölü, Aqmescit ve Partizan suv anbarlarındaki suv yedegi şeerni 3,5 ay devamında toqtamayıp suvnen temin etmek içün yeter.
Herson vilâyetiniñ devlet memuriyeti, aprelniñ 4-nde Şimaliy-Qırım kanalı toldurıldı ve kanaldan işğal etilgen Qırımğa suv berilmey, dep işandırdı.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
