Qırımnıñ Rusiye akimiyeti bildirgenine köre, Aqmescit sakinlerini suvnen temin etken suv borusını artezian quyularından toldurıp başladılar.
Online rejimde suv berilüvi içün tulumbanı Kreml kontrolindeki Qırım yolbaşçısı Sergey Aksenov açtı.
«Voda Krıma» müessisesiniñ reberi Vladimir Bajenovnıñ haber etkenine köre, quyulardan Aqmescitke 21,6 biñ metr kub artezian suvı çekilecek.
Onıñ aytqanına köre, bu «Partizanskoye suv anbarından suv alınuvını eksiltmege» yardım ete.
Akimiyet ileride er kün quyulardan 55 biñ kub suv çekmege planlaştıra.
«Berecek suvıñız şeerniñ suv ihtiyaclarınıñ dörtte birini qarşılaycaq. Aqımdaki sene, pek qurğaq yılda, bu kerekli bir şey. Qırım suvsız qalmaycaq», – dedi Aksenov.
Aksenovnıñ bildirgenine köre, 2020 senesi 150 yıl içinde eñ qurğaq oldı. Mayısta Qırım suv anbarları 7,1 mln metr kubqa daa az toldı, dep bildirdi Qırımnıñ suv hocalığı komiteti.
Ukraina suv problemleri ve melioratsiya institutınıñ müdir muavini Mıhaylo Yatsükniñ fikirince, Qırım suv anbarlarınıñ yedekleri o qadar az ki, yazda yarımadada fevqulâde vaziyet ilân etilecek.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
İyünniñ 11-nde Ukraina baş naziri Denıs Şmığal Kyivdeki matbuat konferentsiyasında Qırımğa Dnipro suvınıñ berilüv meselesi Ukraina kün tertibinde yoq, dep ayttı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
