Bir ay içinde Qırımnıñ suv anbarlarında suv kelmesi eksildi, yarımadada suvnıñ tutumlı qullanılması devam ete. Bunı Qırımnıñ Rusiye ükümeti haber ete.
«Rejim suv ile temin etilgen bölgelerni beslegen suv anbarlarınıñ aqıntısı keçken aftağa baqqanda bir qaç qat eksildi – 1,1 million metr kub az suv aldı ve 4,3 million metr kub teşkil etti. Bu sebepten biz suvnıñ tutumlı qullanmağa devam etemiz», – dedi Qırımnıñ vitse baş naziri Svetlana Maslova.
Bundan ğayrı onıñ qayd etkenine köre, eñ qıyın vaziyet Aluştada.
Rusiye kontrolindeki Qırım ükümetiniñ Mesken-kommunal hocalığı nazirligi yarımadanıñ esas suv anbarlarınıñ tolmasına dair malümatnı yañarttı. Oña köre aprelniñ 16-sı itibarınen evel ölüm seviyede olğan Ayan, Aqyasmecit ve Zagorsk suv anbarlarında suv kelmesi qayd etile.
Qırım Gidromettsentrniñ malümatına köre, 2021 senesi aprelniñ 1-i itibarınen Qırımnıñ suv anbarlarında suv yedekleri 2020 senesine baqqanda aman-aman eki qat azlaşqan.
Evel Rusiyeniñ nezaretinde olğan işğal etilgen Qırımnıñ inşaat ve mimarlıq naziri Mihail Harmov, Federal programması çerçivesinde suv teminatı ile meseleler olğanı içün Rusiye Qırım içün 165 milliard ruble ayırmağa mecbur oldı, dep bildirdi.
Suv qıtlığı sebebinden keçken seneden berli Aqmescitte ve diger regionlarda suv berüv cedvelleri kirsetildi. Bunıñnen beraber Aqmescitte suv teminlevi hatlarında qazalar ola, bu da suv kesilüviniñ sebebi ola.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
