Sentâbrniñ 6-nda qurtarıcılar Sudaq rayonında Qara deñizde suvğa batqan gemide olğan qadınnı qıdırmağa devam eteler, dep bildire TASS Rusiye haber agentilig Qırımnıñ acele hızmetlerine esaslanıp.
İşğal etilgen Qırım müessiseleri bu malümatnı şimdilik tasdıqlamadı.
Haber etilgeni kibi, ğayıp olğan qadın Rusiyeniñ Rostov vilâyetinden keldi.
Tünevin aqşam qurtarıcılar Qara deñizde kezinti gemisi suvğa batqan soñ ğayıp olğan qadın qıdıruvlarını toqtatqan edi.
Bundan evel de qurtarıcılar furtuna sebebinden qadınnı qıdırmağa toqtağan ediler.
Sentâbrniñ 5-nde haber etilgeni kibi, «Kamelot» kezinti gemisi Sudaq rayonında suvğa battı. 12 insan qurtarıldı. Daa bir yolcu qıdırıla.
Geminiñ suvğa batuv resmiy sebebi şimdilik belli degil. Kütleviy haber vastalarınıñ qurtarıcılarnıñ malümatına esaslanıp bildirgenine köre, kezinti gemisi büyük dalğalar sebebinden avdarıldı.
Rusiye Cenübiy naqliyat prokuraturası ve Rusiye Tahqiqat komiteti ilhaq etilgen Qırımda Pribrejnoye köyü yanında kezinti gemisiniñ suvğa batuvını teşkermege başlağanlarını ilân ettiler.
