İlhaq altındaki Qırımda mayısnıñ 11-inde kökke SSSR baş kâtibi İosif Stalinniñ ve sovet marşalı Georgiy Jukovnıñ qırq mertli portretleri köterildi. Qırımtatar Milliy Meclisiniñ reisi Refat Çubarov buña "qırımtatarlarnıñ qanlağan yüregine uruv" dedi.
"RİA Novosti Krım" haber agentligi bildirgeni kibi, portretlerni ava üfürikleri ile köterdiler, Stalinni - Qarasuvbazar civarındaki Aq Qaya yanında, marşal Jukovnı ise - Kefe üzerinde.
"Qırım Aeronavtika federatsiyası Boks Federatsiyası ile böyle etip komandirlerniñ hatırasını añmaq qararına keldi ve Ulu Ğalebeniñ 75 yıllığına bu taacip aktsiyanı bağışladı", - añlattı agentlikke uçucılardan birisi Aleksandr Zmuşko.
Refat Çubarov, bu aktsiyanı tefsir eterek, 76 yıl evel İosif Stalinniñ emri ile yarımadadan qırımtatarlarnıñ zorbalıqnen yapılğan sürgünligini hatırladı.
"Rusiye işğalcileri yıllarnen qanağan qırımtatarlarnıñ yüregini üzerek eñ ağırğan yerine urmağa ögretilgen...", - yazdı Çubarov Facebookta.
İlhaq etilgen Qırımda ve Aqyarda mayısnıñ 9-ında "Ğalebe künü" qayd etile.
Daa evel bildirilgeni kibi, ilkaq etilgen Qırımda mayısnıñ 9-ında koronavirus pandemiyasından sebep kütleviy tedbirler olmaycaq. Mayısnıñ 7-sinde Qırımda mayıs 9-ında keçirileck merasimlerniñ cedvelini ilân etiiler, olarnıñ çoqusı onlayn olacaq.
Aqyarda mayıs 9-ında koronavirus epidemiyasına baqmadan bir sıra merasimlerni keçirecekler. Hususan, gemi ve uçaqlarnıñ paradları olacaq.
Rusiye Mudafaa naziri Sergey Şoygu mayıs 9-ında bir sıra Rusiye şeerlerinde ve ilhaq etilgen Qırımda bayram salütlarnıñ patlatılmasını buyurdı.
Rusiye işğal etken Qırımda 2014 senesinden berli sovetlerniñ ve Rusiyeniñ «Ğalebe künü» Qızıl ordu ve sovet halqınıñ natsist Almaniyası üzerindeki ğalebe künü olaraq qayd etile. Ukrainada mayısnıñ 8-nde Hatıra ve barışuv künü qayd etile, mayısnıñ 9-ı ise – Ekinci cian cenkinde natsizmni yeñüv künü olaraq.
