Rusiye turistleri işğal etilgen Qırımğa raatlanmaq içün barmaq istemeyler, şunıñ içün yerli şifahane yollanmalarğa 30-40% endirimler yapalar. Bu aqta Yalta ve Saq sanatoriylerinde olğan menbalarğa atıf etip, "Suspilne" yaza.
"Keçken sene bu vaqıtta anda bugünki künde olğanından daa çoq adam bar edi. Para yollanmalarını almaq istemeyler, tek bücet hadimleri kele", — dedi Saq sanatoriyiniñ hadimi.
Qırım.Aqiqat yazğanı kibi, Rusiye turoperatorları Qırım yönelişinde turlarğa talap artqanı aqqında optimistik malümat bildire.
Böylece, Rusiye turoperatorlar assotsiatsiyasınıñ vitse-prezidenti, "Delfin" turoperatorınıñ baş müdiri Sergey Romashkin, 2023 senesi yanvar-fevral ayları ile qıyaslanğanda Qırımğa turlarğa talap 50% arttı, dep bildire. Onıñ aytqanına köre, bu rezervatsiyalarnıñ 85%-ı mayıs-avgust aylarına ait.
Romashkinniñ fikirince, Qırımğa yaz seyaatlarını esasen "bu yönelişniñ ananeviy seyircileri" ayırta, olar orta seviyedeki meşur musafirhaneler ve şifahanelerni saylaylar. Amma birinci sınıf turoperator obyektlerine talap daa yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
