İyünniñ 18-ne keçken gece, bol yağğan yağmurlar neticesinde Büyük Yaltanı suv bastı, şeerde cayav keçitleri suv astında qaldı. Bunı Qırımnıñ Rusiye ükümetiniñ matbuat hızmeti haber etti.
«Krımenergonıñ iqtisadiy mıntaqasını suv basa. Şimdi suv astında qalsa, ışıqsız qalırmız. Hastahanelerge bir şey olmadı. İmtianlar keçe. Şeerniñ bazı yerlerinde ise keçmek bile mümkün degil. Blühera soqağı tam şekilde qapalı, çünki anda özen taştı ve yolnı bastı. Puşkina soğağı boyunca suv özen kibi aqa. Yağmur bütün kün yağacaq», – dedi işğal etilgen Yalta memuriyetiniñ başı Yanina Pavlenko.
Onıñ aytqanına köre, çoq qatlı binalardan suvnı boşatmaq içün qum çuvallarından inşaatlar yapacaq avuşıcı brigadalar teşkil etilgen.
Bundan ğayrı Pavlenkonıñ bildirgenine köre, iyunniñ 18-nde saba saat 8-de şeerde Moskovskaya soqağından Kiyevskaya soqağınace cayav keçitler suv astında qalğan.
«Gasprada saba transformator stantsiyasını suv bastı. Er şey er vaqıt kibi çalışa, suv pompalap çekildi. Forosta elektrik üzülgeni sebebinden sanatoriyde tulumba stantsiyası işini toqtattı. Vodokanal qasabanıñ suvnen temin etilmesini toqtattı. Yaltada Lomonosova soqağı yanındaki özen taştı», – dep yazıla bildirmede.
Evel Qırımnıñ işğalci başı Sergey Aksönov Qırımda fevqulâde bir rejim ilân etilmesi aqqında ferman imzaladı.
Keriçte şiddetli yağmurlar neticesinde beş soqaq ve 230-dan ziyade ev ve diare suvğa battı. Şeerniñ merkezi ve 1-nci hastahane elektriksiz qaldı. Suv basuvı yerine Qırımnıñ Rusiye başı Sergey Aksönov keldi, dep yaza Nastoyaşçeye Vremâ. Keriçniñ Rusiye memuriyetiniñ başı Sergey Borozdin, suv taşqını sebebinden zarar körgenler Meridian musafirhanesine avuştırılğanını bildire. Qırımnıñ FVN-niñ malümatına köre, 125 insan tahliye etilgen, olardan 28 bala. Böylece, Yedi Quyu rayonınıñ Priozernoye köyünde 40 adam tahliye etildi, olarnıñ arasında 10 bala, Novootradnoye qasabasında – 15 insan, olardan 5 bala, Keriçte ise 70, olardan 14 bala. Qırımnıñ Gidrometeorologik merkeziyende haber etkenlerine köre, bu gece yarımadanıñ şarqiy rayonlarında yağanaqlarnıñ aman-aman eki aylıq qararı yağğan.
