İşğal etilgen Qırımda saban ayında adaletli makeme aqqınıñ 31 bozuluvı qayd etildi, olardan 11-i qırımtatarlarnen bağlı. Aynı şu vaqıtta Anatoliy Kobzar ğayıp oldı, ve ğayıp olğanınıñ ertesi künü Rusiye akimiyeti onıñ evine kelip, ukrayin vesiqalarını aldı, dep bildire Qırımtatar resurs merkezi.
"Esabat müddetinde apis müddetleriniñ ve ükümlerniñ uzatılmasından ve yañı apis cezalarınıñ tayin etilmesinden ğayrı, advokatlarnıñ temyiz şikâyetleriniñ red etilüvi ve para cezalarınıñ berilüvi qayd etildi", — dep yazıla teşkilâtnıñ esabatında.
Aq qorçalayıcılarnıñ malümatına köre, saban ayında aşağıdaki bozuvlar qayd etildi:
- yedi tintüv, olardan biri qırımtatarlarğa nisbeten;
- 20 kere yaqalav ya da tutuluv, qırımtatarlarğa nisbeten beş kere;
- 20 sorğu, sorav ve "subet", beş qırımtatarlarğa nisbeten;
- 23 apis, qırımtatarlarğa qarşı yedi.
Em de altı kere beden ve ruhiy sağlıqnıñ yüksek seviyesi aqqınıñ bozuluvı qayd etildi, üçü qırımtatarlarğa nisbeten. Bir ay devamında bu aq Ruslan Mesutov, Serğiy Tsiğipa, Aleksandr Sizikov, Nasrulla Seydaliyeva, İrına Danılovıç ve Appaz Kurtametke qarşı bozulğan edi.
"Bu kibi bozuvlar siyasiy mabüslerniñ sağlıq vaziyetiniñ bozulması, advokatlarnıñ ve mabüslerniñ muracaatlarına qulaq asılmaması, tibbiy yardım kösterilmemesi ile bağlı", — dep yaza aq qorçalayıcılar.
Bir ay içinde bir insan ğayıp oldı— saban ayınıñ 5-nde Anatoliy Kobzar Bağçasarayğa işke ketti, amma evge qaytmadı. Ertesi künü onıñ evinde Rusiye quvetçileri tintüv keçirip, ukrayin vesiqalarını tutıp aldı, amma qorantasına onıñ bulunğan yeri aqqında bir şey aytmadılar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
