Bugün saba Rusiye tarafından işğal etilgen Qırımda Bağçasaray rayonında ve Aqyarğa bağlı köylerde qırımtatarlarnıñ evlerinde tintüvler keçirildi. Bunı "Qırım birdemligi" areketi ve Qırımtatar Milliy Meclisiniñ reisi Refat Çubarov bildire.
Bugün saba Bağçasarayda FSB hadimleri çoqbalalı ana ve siyasiy mabüs Remzi Nimetullayevniñ ömür arqadaşı Esma Nimetullayevanı tuttılar.
Bağçasaray rayonınıñ Zalanköy köyünde pedagogika kolleciniñ studenti Nasıba Saidovanıñ evinde tintüv keçirildi.
Bağçasaray rayonınıñ Toçıköy köyünde Elviza Aliyevanıñ evinde tintüv keçirildi.
Bundan ğayrı, tintüvler Aqyar rayonınıñ Mamaşay köyünde Fevziye Osmanovanıñ evinde de keçirildi.
"Qırım birdemligi" haber etkenine köre, tintüvler vaqtında dört qadın tutuldı, episi Aqmescitke, "Qırım Cumhuriyeti ve Aqyar şeeri boyunca RF FSB idaresine" çıqarıldı.
Rusiyeniñ vaqtınca işğal etken Ukrayina topraqlarında, hususan işğal etilgen Qırımda qadınlarnıñ taqip etilüvi Moskvanıñ ayrı, maqsatlı siyasetine çevirildi, dep bildire Qırım aq qorçalayıcı gruppası. Rusiye akimiyeti ana-baba aqlarından marum etüv qorquzuvları ve "devlet hainligi" ve "casuslıq" maddelerine istinaden qabaatlavlarnı qullanıp, repressiyalarnı bilerek quvetleştirdi.
