Ukrayina Milliy telükesizlik ve mudafaa şurasınıñ kâtibi Oleksiy Danılov S-400 Rusiye zenit-raketa kompleksi yañı ukrayin raketası ile yoq etilgenini bildirdi .
"Raketa yañı edi, raketa zemaneviy edi... Ebet, bu bizimi yañı silâmız. Ve o özüni mükemmel kösterdi", - dep bildirdi o.
Qullanılğan raketanıñ türü ne olğanını Danılov bildirmedi.
Avgustnıñ 23-nde Ukrayina Mudafaa nazirliginiñ Baş istihbarat idaresiniñ reberi Kırılo Budanov işğal etilgen qırımda S-400 "Triumf" Rusiye zenit-raketa kompleksiniñ yoq etilmesi aqqında haber etti. Berilgen malümatqa köre, saat 10-larda Olenivka köyü yaqınlarında Tarhankut burnunda patlav yüz bergen. Onıñ neticesinde S-400 "Triumf" Rusiye zenit-raketa kompleksi, raketalar ve arbiyler yoq etilgen. Rusiye tarafı bu bildirüvni izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
