İşğal etilgen Qırımda Olenivka köyüniñ yaqınlarında S-400 Rusiye ava mudafaası kompleksi yoq etilgen, dep bildirdiler Ukrayina Mudafaa nazirliginiñ Baş istihbarat idaresinde.
"Avgustnıñ 23-nde saat 10-larda işğal etilgen Qırımda Tarhankut burnunda Olenivka köyü yaqınlarında patlav yüz berdi, bunıñ neticesinde S-400 Rusiye ava mudafaası kompleksi yoq etildi", - dep haber etile.
Haber etilgeni kibi, patlav neticesinde cihaznıñ özü, raketalar ve arbiyler yoq etilgen.
Rusiye akimiyeti ve Qırımdaki RF arbiyleri vaziyetni şimdilik daa izaatlamadılar.
Evel içtimaiy ağlarda Qırımnıñ ğarbındaki Olenivka köyüniñ civarında tüsses fotosını yayınlağan ediler.
Bir sıra telegram kanalı köyniñ yaqınlarındaki Rusiye arbiy obyektlerine darbe endirilgenini tahmin eteler. Şu cümleden, "Krımskiy veter" telegram kanalı Tarhankutta yedi patlav ve radar stantsiyasında darbe endirilgeni aqqında yaza. Bunıñ doğru olıp olmağanına dair malümat yoq.
Rusiye Fevqulâde vaziyet nazirliginiñ Qırım boyunca idaresi başta quru otnıñ yanğanı aqqında haber etti, biraz sonra bu malümatnı yoq etti.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi.
Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
