Rusiyeniñ "Krımenergo" şirketinde qırımlılardan elektrik energiyasını iqtisat etmekni rica ettiler. Qayd etilgenine köre, anomal sıcaq sebebinden aletlerniñ işi toqtatıla bile.
"Tehnologik bozuluvlar ve elektrik energiyasınıñ uzatılmasında uzun müddetli toqtatmalar olmasın dep, mütehassıslar anomal sıcaq künleri bütün qullanıcılarnı elektrik energiyasını iqtisatlı qullanmağa çağıralar", — dep aytıla beyanatta.
Şirkette qoştılar ki, kondisioner ve buzdolaplarınıñ çoq qullanıluvı neticesinde ağnıñ yükü arta.
Qırımda iyül 15-19 künleri +38 derecege qadar anomal sıcaq sebebinden furtuna havfı ilân etildi.
Daa evel Qırımnıñ bir çoq rayonında yarıqnıñ kesilmesi yüz berdi. Yalta, Kezlev, Aluşta, Aqmescit qısmen ışıqsız qaldı. Qırımnıñ Rusiye yolbaşçısı Sergey Aksönovnıñ bildirgenine köre, elektrik energiyasınıñ söndürilüvi anomal sıcaq ava ile bağlı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
