7 biñden çoq asker Rusiyeniñ büyük talimlerinde iştirak ete, askerlerniñ bir qısmı işğal etilgen Qırımda askerlik yapa. Bu aqta Rusiye mudafaa nazirliginiñ matbuat hızmeti bildire.
Rusiye Cenübiy arbiy okrugınıñ matbuat hızmeti yolbaşçısı Vadim Astafyevniñ tarif etkenine köre, Qırımda motoatıcılıq ve tank bölükleriniñ eki taraflı rota taktik talimleri keçirilecek. Planlaştırılğanına köre, er bir talimde eki rota taktik gruppası biri-birine qarşı areket ete. Rusiye Mudafaa nazirligi, komandanlardan «zemaneviy silâlı zıddiyetlerdeki, şu cümleden Suriyedeki tecribeni qullanıp», standarttan tış qarar kösterecegini bekley.
Haber etilgeni kibi, talimlerniñ keçirilüvinde 50 uçaq ve vertolöt, tahminen 2 biñ arbiy tehnika qullanıla.
Bundan evel Qırımda Rusiye arbiyleri Rusiye Qara deñiz flotunıñ deñiz aviatsiyası yerleşkenler uçaq alanlarından birine yapılğan diversion-istihbaratçı gruppasınıñ ücümine qarşılıq kösterüv talimlerini keçirdi.
2014 senesi Rusiyeniñ Qırım işğalinden soñ yarımadada arbiy talimler muntazam sürette keçirilip başladı. Ukraina Baş ştabı, Rusiye arbiyleriniñ areketlerini qanunsız dep adlandıra.
2018 senesi dekabrniñ 17-nde Qırım, Qara ve Azaq deñizleriniñ askeriyleştirilüvinen bağlı qabul etilgen BM Baş Assambleyasınıñ rezolütsiyası Rusiyeni Qırımdan askerlerini çıqarmasına çağırıp, Qara ve Azaq deñizlerinde asker sayısınıñ arttırıluvını takbih ete.
