İlhaq etilgen Qırımda ve Aqyarda rusiyeli saylavlarda iştirak etken qırımtatarlarnıñ sayısı "pek yüksek olmaz", amma keçken yıllarğa köre, saylavğa barğan qırımtatarlarnıñ sayısı artacaq. Bunı sentâbr 8-inde qırımtatar faali Nariman Celâl Qırım.Aqiqatqa ifade etti.
"Saylavlarğa baracaq qırımtatarlar aqqında. Eminim ki, fayız pek yüksek olmaz. Ve Rusiye akimiyetine, olar altı yıldan berli qandrmağa tırışqan qırımtatarlanıñ qol tutuvınen maqtanmağa iç temel yoq, belleyim. Bundan ğayrı, çoqusı mecburen baracaq: sotsial işçiler, devlet işçileri ve ilâhre", - qoştı faal.
Qırımtatar faali, 2014 yılğa köre, saylavğa barğan qırımtatarlarnıñ sayısı artqan, dep tüşüne.
"Ne de olsa, bayağı vaqıt keçti. Çoqusı bu işğalci sistemağa alıştı. Birileri Qırımnıñ qaytarılmasından ve Ukraina bütünligi tiklenmesinden ümütlerini kesti. Mıtlaqa da Ukrainada olğan şeylerlerge baqsañ, o, eminlikni köstermey ve siyaset ve mefküre tarafından deñişip tura. Çoqusı bunıñ içün ya lâqayt, ya ümütsiz qala. Böyle keyfte, belki de, birevler saylavğa da barar", - dep qoştı Celâl.
Rusiye akimiyeti, Qırım ve Aqyarda Qırım parlamenti ve yerli şuralarnıñ saylavlarını 2019 senesi sentâbr 8-inde keçire. Ukraina, ABD, Aropa Birligi ve dünyanıñ daa bir sıra memleketleri bu saylavlarnıñ qanuniyligini qabul etmey.
Qırım.Aqiqat, Qırım ve Aqyarda rusiyeli saylavnıñ keçirilmesini közete.
Daa evel Ukraina mebusı, "Avropa birdemligi" partiyasınıñ daa bir reisi İrına Geraşçenko, Ukrainanıñ Yuqarı Radasını, rusiyeli saylavlarnıñ neticelerini qabul etmemege çağırttı.
