Qırımda, Nijnegorskiy qasabasınıñ mezarlığında rusiyeli "cenk mühbiri" Aleksandr Fedorçak ve daa üç Rusiye arbiy adamınıñ mezarlarını yaqtılar. Bu aqta saban ayınıñ 31-nde saba Nijnegorsk rayonınıñ Rusiye memuriyetiniñ yolbaşçısı Anton Kravets bildirdi.
"O yerde uquq qoruyıcı organlarınıñ hadimleri çalışa. Vaziyetler, sebepler ve alâqası olğan şahıslar belgilene. Elâk olğanlarnıñ qorantalarına bütün kerekli yardım kösterilecek", — dep yazdı Kravets öz telegram kanalında.
Rusiye quvetçileri vaziyetni şimdilik izaatlamadı.
Saban ayınıñ 24-nde haber etilgenine köre, Rusiyeniñ "İzvestiya" neşriniñ mühbiri Aleksandr Fedorçak, o daa evel Rusiyeniñ "Krım-24" telekanalında çalışqan edi, Lugansk vilâyetinde elâk oldı. "ForPost" Sevastopol neşiri, Fedorçak HIMARS tarafından maşnasına yapılğan darbe neticesinde elâk oldı, dep bildire.
1996 senesi doğğan Aleksandr Fedorçak Qırımdan edi. O, "Krım24" Rusiye telekanalınıñ muarririyetinde mühbir olaraq çalıştı, soñra ise öz karyerasını şef muarririyetinen devam etti. Daa soñra Fedorçak, Rusiyeniñ "İzvestiya" neşirinde ve "Yıldız" telekanalında çalışıp, Rusiyeniñ Ukrayinağa tam mıqyaslı istilâsı aqqında süjetlerni çıqarmağa başladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
