Saq rayonınıñ Orehovo köyünde fevralniñ 8-nde Rusiye uquq qoruyıcıları Ukraina tarafdarı olğan faal Oleg Prihodkonıñ evini tintti. Bu aqta fevralniñ 9-nda Prihodko Qırım.Aqiqatqa tarif etti.
«Tünevin (fevralniñ 8-nde – QA) tintüv keçirgenler. Bir sıra silâlı uquq qoruyıcı bar edi. Menim ve ömür arqadaşımnıñ bilgisayarlarını, cep telefonlarını, Ukraina timsallerini, bayraqlarnı alıp ketkenler. Maşinadan bile alıp çıqarğanlar. Alman avtomatlarınıñ maketlerini bile alğanlar. Tintüvni keçirip, gece Saqta sovet uçucılarınıñ mezarları aqaretlendi, svastika sızıldı, dep aytqanlar. Ve olar ne içündir maña kelmegen qarar bergenler», – dep ayttı Prihodko.
Onıñ aytqanına köre, tintüvden soñ onı Aqmescitke alıp ketkenler, anda cep telefonındaki bütün nomeralarnı yazıp alğanlar, subet keçirip, «menden alınğan şeylerniñ ekspertizası yapılacaq», degenler.
Rusiye uquq qoruyıcıları Prihodkonıñ evinde keçirilgen tintüvni izaatlamay. Faalniñ malümatı başqa bir menbada tasdıqlanmay.
2016 senesi iyün ayında Rusiye uquq qoruyıcıları Oleg Prihodkonı maşinasındaki ukrain nomeraları sebebinden tutqan edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
