Rusiyeniñ nezaretinde olğan "Qırımtatar milliy ve medeniy muhtariyetiniñ" yolbaşçısı Eyvaz Ümerov Qırımnıñ işğal akimiyetiniñ binası ögünde bir kişilik piket keçirgen soñ quvetçiler tarafından tevqif etildi ve yañı yılnı apishanede keçirdi. Bunı Qırım.Aqiqat mühbiri haber etti.
Dekabrniñ 28-nde Eyvaz Ümerov Aqmescitte Rusiye ükümeti binasınıñ qarşısındaki Lenin meydanında bir kişilik piketke çıqtı. Rusiye prezidentine muracaatında o, Rusiye ükümetinde "beşinci kolonna"nıñ meydanğa çıqarılması ide oğraşqanı ve bunıñ içün taqip etilgenini bildirdi.
"Qırım başlıqları cinayet davalarını uydırıp, meni taqip eteler, evimde tintüvler keçireler. Meni yoq etmek isteyler. Cumhuriyetniñ qanun qoruyıcı organları menim muracaatlarımnı körmegen kibi yapalar, mahkemecilerge basqı etile, bu buyurıqlar Nazirler şurasından kele. Meni apishanege oturtmaq isteyler", - dedi Eyvazov piket vaqtında.
Şu künü aqşam ekstremiz ile küreş bölüginiñ hadimleri onı polis bölügine ketirdiler, anda oña qarşı RF iş yürsetme qanunnamesiniñ 20.2 maddesine binaen protokol tizildi. Eyvaz Ümerov 10 künge tevqif etildi.
Milliy Meclis reisiniñ muavini İlmi Ümerov, faalge qarşı basqılar Qırımnıñ işğal yolbaşçısı Sergey Aksönovnınıñ çevresini tenqit etken soñ başlanğanını aytı.
Onıñ sözlerine köre, Eyvaz Ümerovnıñ tevqif etilmesi Rusiye qanunlarına köre bile qanusızdır.
Oktâbrniñ 3-nde Eyvaz Umerov Ervin Musayevni «Ukrayınağa qoltutqanında» qabaatlap kötekleşti. Musayev oña «Rusiyege qoltutqanı içün» ücüm etkenler dedi.
Qırımdaki Rusiye polisi Eyvaz Umerovğa qarşı cinaiy dava açtı. Onı «orta seviyeli zarar ketirgeninde» qabaatladılar. «Mash na volne» Telegram kanalınıñ malümatına köre, Musayevniñ mañlayında açıq yaralar bar ve közlügi parçalandı, ekimler miy sarsuvı olğanını qayd etti.
«Mirotvorets» Ukrayına merkeziniñ malümatına köre, Eyvaz Umerov Rusiyege qoltuta, Rusiyeniñ Ukrayınağa qarşı ücümini destekledi. Rusiye mahkemesinde Qırımtatar Milliy Meclisiniñ reis muavini Ahtem Çiygozqa qarşı şaatlıq etti.
Ervin Musayev «Mirotvorets» bazasında bar. Özüni Qırımnıñ Rusiye yolbaşçısı Sergey Aksenovnıñ mesleatçısı ve Rusiye kontrolindeki Bağçasaray şeer şurasınıñ deputatı olaraq tanıta. 2020 senesi fevral ayında Musayev Rusiyege qoltutqan «Millet» qırımtatar telekanalınıñ baş müdiri vazifesinden ayırıldı. 2017 senesi iyül ayında «Milletniñ» baş müdiri vazifesine tayin etilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
