"Hususan, işğal etilgen Qırımda, meselâ, ticaret merkezleri yanında yerleşken mobil mobilizatsiya brigadaları çalışa. Olar er adamnı istilâcı memleketniñ Mudafaa nazirliginiñ muqavelesini imzalamağa çağıralar", — dep ayttı Bariyev.
Onıñ aytqanına köre, Rusiye ordusına ketken insanlarğa topraq uçastkaları, yüksek aylıqlar ve ilâhre bermek vade eteler.
"Duşman teşviqat içün muntazam çalışa. Men bellesem, Ukrayina Silâlı quvetleri ABD-den silâ alğan soñ, cebede deñişmeler başlağanda, rusiyeliler mobilizatsiyanı daa da quvetleştirecek", — dedi o.
Qırımtatar resurs merkeziniñ kommunikatsiyalar boyunca meneceri Tatyana Savçuk ilhaq etilgen Qırımda Rusiye akimiyeti 15 biñ insannı Rusiye Silâlı quvetlerine çağırmaqnı planlaştıra, dep bildirdi.
Ukrayina prezidentiniñ Qırım Muhtar Cumhuriyeti ve Aqyardaki temsilciligi Qırımda Rusiye Silâlı quvetlerinde hızmet etmege mecbur etilgen Ukrayina vatandaşlarını bu aqta haber etmege çağırdı. Müessisede eminler ki, Qırımda bulunğan Ukrayina vatandaşlarınıñ askerlikten qaçınmaq ıntıluvlarına baqmadan, Rusiye akimiyeti olarnı cinaiy taqip mehanizmleri vastasınen hızmet etmege mecbur etmege tırışacaq. 520 adise aqqında endi belli, olardan 206-sı 2022 senesi fevralniñ 24-nden soñ qayd etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
