Qırımdaki Rusiye quvetçileri, Ukrayina silâlı quvetlerini paranen temin etmek içün notariustan büyük miqdarda para talap etken erkekni tuttı. Bu aqta TASS Rusiye devlet agentligi Rusiye İçki işler nazirliginiñ vekili İrina Volkqa atıf etip bildire.
''Qırımda politsiya hadimleri Aqmescit sakininden büyük miqdarda para talap etüvde şeklengen şahısnı yaqaladı. İlk malümatlarğa köre, cinayetçi zorbalıq qullanuv tehdidi ile notarius qadından para talap ete edi'', - dep yazıla bildirmede.
Qayd etilgenine köre, şübeli ve ana-babasınıñ evinde cep telefonları, sim-kartlar, para, vesiqalar ve başqa delil olaraq sayılğan şeyler alınğan.
Rusiye quvetçileri Rusiye Ceza qanunnamesiniñ 163-ünci maddesiniñ 2-nci qısmına binaen cinaiy dava açtılar . Şübeli apiske alındı. Onıñ açıq izaatlarını Rusiye kütleviy haber vastaları derc etmey.
Qırımda ve Aqyarda 2014 senesinden başlap eñ azından 16 Ukrayina vatandaşı "casuslıq" ve "diversiya"da qabaatlanıp mahküm etildi. 2015 senesi Rusiye mahkemesi rejissör Oleg Sentsovnı teraktlarnıñ teşkil etilmesinde qabaatlap, 20 yılğa mahküm etti. Rusiye quvetçileri "diversiya"nı ''Hizb ut-Tahrir'' islâm siyasiy teşkilâtınıñ vekillerine de yükley. Rusiyeniñ Ukrayinağa büyük cenki başlağan soñ yarımadada cenk ile razı olmağanlarnıñ episi kütleviy surette taqip etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
