"Soñki afta devamında yarımada boyunca mobil blokpostlar quruldı, arbiyler ve polis patrulli naqliyatnı teşkere ve et qıdıra. "Diversantlarğa" qarşı küreşken talimler, aslında eali üzerinde nezaretni quvetleştirmek ve mecburiy seferberlikke celp etmek içün yapıla", — dep bildire kanal.
Bu malümatnı mustaqil olaraq tasdıqlamaq mümkün degil.
Qırımnıñ Cenübiy yalısında "terrorizmge qarşı talimler" çerçivesinde blokpostlar donatıldı, dep tarif ettiler Qırım.Aqiqatqa şaatlar. Olarnıñ aytqanına köre, Aluşta yolunıñ eki tarafında qum torbalarından yapılğan qaleler qoyuldı.
Talimlerniñ faal basamağı sentâbr 26-da başlandı. Rusiye tarafından ilhaq etilgen Qırım yarımadasında Rusiye quvetçileri yollar, müim obyektler ve plâjlar yanında sıñır noqtaları, ateş noqtaları ve qamaçav noqtalarını qura. Silâlı quvetler ve teroboronalar memuriy rayonlarnıñ blok etilmesi ve teşkerüv tedbirleri ile meşğuliyetlerni keçire. Qırımnıñ Rusiye yolbaşçısı Sergey Aksönov qırımlılarnı "oquvlarda yardım etmege ve tınçlıq saqlamağa" çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
