Qırımda Rusiye quvetçileri Herson vilâyetinde Rusiye ordularınıñ bulunması aqqında malümat bergen Ukrayina vatandaşını tuttı. Bu aqta oktâbrniñ 18-nde Rusiye kütleviy haber vastaları Rusiye FSB-sı cemaat alâqaları Merkeziniñ malümatına esaslanıp bildire.
Berilgen malümatqa köre, Herson vilâyetiniñ 2001 senesi doğma sakinine Rusiye Ceza kodeksiniñ 276-ncı maddesine istinaden cinaiy iş açıldı, oña 20 yılğa qadar azatlıqtan marum etüv cezası berile bile. Tutulğan qadınnıñ adı bildirilmey. Şimdilik onıñ imayesiniñ iç bir açıq noqta-i nazar yoq.
Qırımda ve Aqyarda 2014 senesinden başlap eñ azından 20 Ukrayina vatandaşı "casuslıq" ve "diversiya"da qabaatlanıp mahküm etildi. Ukrayinağa qarşı tam miqyaslı istilâ başlanğan soñ Rusiyede ve işğal etilgen topraqlarda cenkke qarşı çıqqanlar kütleviy surette taqip etile.
Bu yıl yazda ZMINA insan aqları merkeziniñ idare yolbaşçısı Tatyana Peçonçik, "Qırım platforması" Halqara ekspert ağınıñ III Halqara forumı vaqtında, Qırımda devlet hainligi ve çetel devleti ile işbirligi maddeleri boyunca Rusiye akimiyetiniñ qabaatlavları artqanını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
