Qırımda yanvarniñ 23-nde yerli vaqıt ile saat 6:00-da Rusiye quvetçileri Merkeziy saylav komissiyasınıñ Qırımtatar halqı Qurultayı delegatlarınıñ saylavları boyunca reisiniñ muavini Nazim Memetovnıñ evinde tintüv keçirdi, dep bildire "Qırım birdemligi" cemaat birleşmesi.
Memetovnıñ aytqanına köre, tintüvni 12-15 kişi ve Rusiye cinaiy-qıdıruv organınıñ hadimleri olaraq tanığan daa 5-6 kişi keçirdi.
"Olardan biri Aqmescit Kiyev rayon mahkemesiniñ mahkemecisi Çumaçenkonıñ qararını oqudı: Rusiye Federatsiyasınıñ Ceza kodeksiniñ 222 maddesine istinaden (qanunsız silâ ayırıluvı) operativ-qıdıruv tedbirleri keçirile. Mahkemeci eki adreste tintüv keçirmege qarar berdi - men yaşağan yerde ve qomşu bölükte", - dep bildirdi Qırımtatar Milliy Qurultayı MSK reisiniñ muavini.
Memetovnıñ bildirgenine köre, tintüv tahminen dört saat devam etti. Tintüv neticesinde Rusiye quvetçileri cep telefonı ve noutbuknı tutıp aldılar. Amma iç bir qabaatlav ya da şübe kösterilmegen. Memetovnıñ tahmin etkenine köre, Rusiye quvetçileriniñ bu areketleri 2014 senesinden berli Vatanımızda yüz bergen vaqialarnen razı olmağan bütün qırımtatarlarğa planlı basqıdır.
Resmiy şekilde Rusiye quvetçileri bu vaziyetni izaatlamadı.
Nazim Memetov 2022 senesi mart ayında Rusiye quvetçileri tarafından onıñ evinde keçirilgen tintüv vaqtında Qırımtatar Milliy Qurultayınıñ Merkeziy saylav komissiyasınıñ reisi Zair Smedliniñ menfaatlarını temsil etken edi. O vaqıt tintüvden soñ Zair Smedlâyevni tutıp, yerli Rusiye politsiyasınıñ bölügine alıp ketken ediler. Rusiye nezaretindeki Qurman rayon mahkemesi Qurultay Merkeziy saylav komissiyasınıñ reisini "Rusiyeniñ Ukrayinağa qarşı cenki esnasında Rusiye ordusınıñ itibarını tüşürgeninde" qabaatlap, 40 biñ ruble para cezasını bergen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
