Qırımda Rusiye quvetçileri "Noman Çelebicihan" qırımtatar batalyonında iştirak etkeninden şübeli sayılğan erkekni tuttı. Bu aqta Rusiye kütleviy haber vastaları Qırımdaki Rusiye Federal havfsızlıq hızmetiniñ matbuat hızmetine atıf etip yaza.
"Qırım Cumhuriyeti ve Aqyar boyunca Rusiye Federal telükesizlik hızmeti Qırım Cumhuriyeti boyunca Rusiye Federal telükesizlik hızmetiniñ sıñır idaresi ile beraberlikte "Noman Çelebicihan qırımtatar batalyonı" qanunsız silâlı birleşmeniñ azası olğan 1988 senesi doğğan Rusiye vatandaşını tuttı", – dep bildire TASS Rusiye devlet haber agentligi.
Rusiye telükesizlik hızmetiniñ hadimleriniñ aytqanına köre, aqay "qırımtatar batalyonına" 2015 senesi qoşuldı ve Rusiye menfaatlarına qarşı işinde faal iştirak etti. Ateşli silâ ile teminlengen, o, keçiş noqtalarında insanlarnı ve naqliyatnı teşkermek vazifelerini eda ete edi.
Yaqalanğannıñ adı ve soyadı aydınlatılmay, onıñ açıq izaatları da yoq.
Bundan evel Qırımtatar Resurs Merkeziniñ başı Eskender Bariyev "Supilne"ge intervyüsında rusiyeliler "Noman Çelebicihan" qırımtatar batalyonına alâqası olğanında qabaatlanğan 33 ukrayinalını tutqanını bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
